-Bllokada ruse e grurit/ Në Shqipëri rrezikohet rritja e çmimit të bukës!
Kryetari i Shoqatës së Industrisë Përpunuese të Miellit, Adi Haxhiymeri, në një intervistë për gazetën “Fjala” pranon se bllokimi i eksportit të drithit nga Rusia do të prekë edhe vendin tonë, por ai shton se kompanitë importuese kanë rritur importin në muajin prill, duke siguruar kështu rezerva për disa muaj.
Rusia, eksportuesi më i madh i drithit në botë ka kufizuar eksportin e grurit, për shkak të pandemisë së koronavirusit. Ekspertët e huaj vlerësojnë se për vendet më të pasura, të goditura nga recesioni i koronës, kjo do të sillte një rritje të kostos së jetesës, ndërsa për vendet më të varfra dhe shumë të varfra, pasoja do të ishte krizë urie. Si e shikoni ju këtë moment?
Po, është e vërtetë që Rusia edhe për arsye të masave anti Covid-19 vendosi kuota në eksportin e disa artikujve, ku hyjnë dhe drithërat.
Autoritetet përkatëse të Rusisë në fund të marsit vendosën që për periudhën 1 prill – 30 qershor kuotat e eksportit të drithërave të ishin 7 milionë ton, meqenëse në korrik fillojnë korrjet e reja.
Aktualisht kanë mbetur rreth 2 milionë ton akoma pa u ekzekutuar si lëvizje malli, ndërsa si kuotë tashmë e gjitha është e kontraktuar.
Kjo bëri që çmimi i grurit të rritet me 40 USD për ton (nga 220 në 260 USD për ton) por solli edhe shumë vështirësi në gjetjen dhe sigurimin e tij, sepse shumë shtete e sigurojnë një pjesë të mirë të nevojave të grurit vetëm nga Rusia.
Po vendi ynë, nga cilat shtete e bën importin e drithit dhe a do të ndikohet nga kufizimi i eksportit rus?
Shqipëria siguron rreth 70-80 % të nevojave të saj nga eksporti me Rusinë. Për muajin prill është rritur ndjeshëm importi i grurit nga kompanitë shqiptare, të cilat mund të kenë siguruar rezerva për rreth një muaj e gjysmë ose pak më tepër ndonjëra prej tyre, çka do të thotë që pak para korrjeve ndoshta çmimet e miellit do të reflektojnë këtë rritje të çmimit të grurit.
Në terma të thjeshtë për qytetarët, çfarë do të sjellë një gjë e tillë; rritje të çmimit të bukës, apo mund të sjellë krizë urie, që siç paralajmëron OKB-ja mund të marrë ndoshta “përmasa biblike” në rrethanat e një pandemie?
Në rastin e Shqipërisë nuk bëhet fjalë për gjendje urie, por për rritje çmimi, gjë që me siguri do të ndodhë në momentin kur do të mbarojnë rezervat. Ndërsa për pyetjen a do të rritet çmimi i bukës, këtë nuk mund ta them për dy arsye, së pari është një nga gjërat më sensibël dhe unë nuk mund ta komentoj dhe, së dyti, ai është një biznes tjetër dhe unë nuk mund të flas në emrin e tyre.
Edhe korrjet e reja, sipas të gjitha të dhënave, si rezultat i thatësirës së zgjatur nuk priten të mbara, çka do të thotë çmime më të larta se vitin që shkoi, por kjo pritet për t’u parë në korrik.
Sa i përgatitur është shteti shqiptar për t’i bërë ballë një situate emergjente të furnizimit me drithë? Sa e ka kapacitetin e prodhimit të grurit Shqipëria dhe a mund të mendojmë skenarin e vetëfurnizimit?
Për sa i përket shtetit shqiptar, as që bëhet fjalë për masa mbrojtëse ose rezerva ushqimore. Çdo gjë do të varet nga kompanitë e prodhimit të miellit, se sa kapacitet do të kenë për të krijuar rezerva. Mbulimi i nevojave të grurit në vend është i mundur, por do të kërkonte në radhë të parë mbështetje të fuqishme nga shteti për fshatarin (sikurse në të gjithë rajonin) dhe shoqërimi i kësaj me një politikë disavjeçare.
-Siguria ushqimore duhet të jetë pjesë e sigurisë kombëtare- Arben Malaj
-Si do të ndikojë në Shqipëri bllokimi i eksportit të grurit nga Rusia?!- Adrian Civici
