Drejtoria e Përgjithshme e Tatimeve ka përditësuar të dhënat në lidhje me përfituesit e paketës së dytë të qeverisë për përballimin e pasojave të pandemisë. Deri dje kanë aplikuar 100210 punonjës nga 31850 biznese.
Nga totali i kërkesave 87360 punonjësve u është aprovuar aplikimi dhe janë paguar 78% e tyre ose 78014 punonjës.
Deri tani është shpërndarë 44% e shumës të parashikuar nga qeveria për 176 mijë përfitues me paketën e dytë. Shuma e lëvruar në llogaritë e individëve, sipas Drejtorisë së Përgjithshme të Tatimeve është rreth 3,1 miliardë lekë.
Tatimet bëjnë të ditur se aplikimet u janë refuzuar rreth 3,5% të totalit të personave aplikues ose 3,572 punonjësve. Numri i bizneseve që u është refuzuar aplikimi rezulton 746 dhe kërkesat e refuzuara janë 781. Tatimet kanë në proces shqyrtimi 9278 kërkesa nga të punësuarit ose 9% të totalit të aplikimeve të tyre.
Në njoftimin e Tatimeve mësohet se numri i përfituesve me Masën 1 është 3304 punonjës, ku përfshihen të “të punësuarit e subjekteve me të ardhura vjetore mbi 14000000 lekë, të mbyllura sipas Urdhrit/ave të MSHMS, të cilët kanë qenë në punë në datën e hyrjes në fuqi të Urdhrit/urdhrave të MSHMS”. Paketa e dytë financiare ka nisur të shpërndahet prej 21 prillit dhe me Masën 1 është miratuar aplikimi për rreth 13% e përfituesve të parashikuar nga Ministria e Financave. Për Masën 1, sipas të dhënave të Financave do të përfitojnë 26 mijë punonjës (nga të cilët 6 mijë të larguar nga puna) në 1286 biznese me xhiro mbi 14 milionë lekë. Sipas tatimeve, me Masën 2 numri i kërkesave të miratuara është 25769 persona, o 25% nga totali i numrit të punonjësve aplikantë.
Masa 2 përfshin “Të punësuarit e subjekteve të lejuara për të ushtruar aktivitet, të cilët janë larguar nga puna nga data e hyrjes në fuqi të Urdhrit/urdhrave të MSHMS deri në datën 10 Prill 2020, të cilët përfitojnë ndihmë financiare prej 40000 (dyzet mijë) lekë. Data e dorëzimit të formularit E-sig 027, nuk duhet të jetë më e vonë së 10 Prill 2020”. Në paketën e miratuar për masën 2, Ministria e Financave parashikon që ndihma të shpërndahet për 40 mijë punonjës të larguar nga puna në 6300 biznese. Deri tani janë miratuar kërkesat për 64% të totalit të punonjësve që parashikohet të përfitojnë ndihmën.
Numri më i ulët kërkesave të miratuara deri tani është i atyre me Masën 4, ku përfshihen “Të punësuarit e subjekteve që ushtrojnë aktivitet në sektorin e strukturave akomoduese, të cilët figurojnë në listëpagesat e subjekteve deri në datën e Urdhrit/ave të MSHMS, dhe përfitojnë ndihmë financiare prej 40000 (dyzet mijë) lekë. Nëse subjekti ushtron disa lloje aktivitetesh, përfitojnë vetëm të punësuarit në aktivitetin e strukturës akomoduese”.
Për sektorin e turizmit janë miratuar rreth 1% e totalit të individëve që kanë aplikuar ose 1930 individë. Nga qeveria parashikohet që numri i përfituesve të jetë 10 mijë punonjës në 1214 biznese që operojnë në sektor. Nga sa është parashikuar, numri i aplikimeve të miratuara deri tani është 19%.
