I vetëm përballë një parade ushtarësh, Vladimir Putin ka mbajtur fjalimin dhe vendosi lule në memorialin në nder të heronjve që mposhtën nazizmin 75 vite më parë. Rusia kishte planifikuar ceremoni të mëdha për këtë ditë të rëndësishme, por pandemia e koronavirusit ka ndryshuar planet.
Presidenti rus respektoi të rënët e Luftës së Dytë Botërore, ndërkohë që nuk shoqërohej nga asnjë personalitet tjetër me qëllim për të ruajtur sigurinë ndaj COVID-19.
Edhe në shtete të tjera të Evropës u zhvilluan ‘festime të heshtura’ për 75 vjetorin e fitores ndaj Gjermanisë naziste. Kryeministri britanik, Boris Johnson mbajti 2 minuta heshtje, ndërsa presidenti francez, Emmanuel Macron i bëri nderimet në Harkun e Triumfit në Paris. kancelarja gjermane, Angela Merkel nderimet i bëri në memorialin Ora e Re (Neue Wache).
Më 8 maj 1945, Mbretëria e Bashkuar dhe aleatët e saj pranuan zyrtarisht dorëzimin pa kushte të Gjermanisë naziste pas 6 vitesh luftë shkatërruese, e cila mendohet se shkaktoi deri në 60 milionë viktima.
Kryeministri britanik Winston Churchill do të njoftonte në orën 15.00 në radio se lufta në Evropë kishte përfunduar.
Ndërkohë që luftimet u përqëndruan më pas në Azi, për t’u përmbyllur më 2 shtator 1945 kur Japonia pranoi kapitullimin.
