Një hotel i ri do të ngrihet në zonën e ‘Zogut të Zi’ në Tiranë. Portali i Ndërtuesve ka bërë publik projektin e kullës prej gati 15 kate, e cila është pagëzuar me emrin “Urban Hotel” dhe që do të ndërtohet midis rrugës “Asim Vokshi” dhe rrugës “Mine Peza”.
Nëntë kate të kullës do të jenë shërbime për fjetje dhe katër kate shërbime në favor të hotelerisë.
Por ky nuk është projekti i vetëm i hotelerisë në Tiranë, pasi tek Stacioni i Trenit, në anë të Bulevardit të ri, është gati të nisë zbatimi i një projekti që synon ndërtimin e një kulle rreth 30 kate dhe që do të shërbejë si hotel, i cilësuar me emrin “Hotel Toëer”.
Ndërkohë, pak javë më parë ACCOR Hotels, një markë ndërkombëtare hotelerie njoftoi se do të hyjë në tregun shqiptar me një strukturë akomoduese nën emrin Novotel, që pritet të hapet në vitin 2021. Partneri shqiptar është Bolv Oil Group. Struktura e re akomoduese pritet që të ketë 130 dhoma, ndërkohë që gjithë Novotel Tirana do të ketë mbi 7,000 m² zona të dedikuara për shërbime të integruara.
Edhe Hotel Tirana, i njohur si 15 katëshi, po zgjerohet me një hotel të ri rreth 30 kate me pesë yje, ndërsa ish-Sheratoni do të zgjerohet me vila të vogla. Në anë të Sheshit Skënderbej është në ndërtim një tjetër kullë që do të shërbejë si hotel me pesë yje dhe do të operohet nga grupi spanjoll Melia.
