I biri i gazetarit saudit i cili mbeti i vrarë, Jamal Khashoggi ka lëshuar një deklaratë përmes së cilës thotë se “i fal vrasësit e të atit”.
Khashoggi, një kritik i vazhdueshëm i qeverisë saudite, u vra brenda konsullatës së mbretërisë në Stamboll, në tetor të vitit 2018.
Zyrtarët sauditë e cilësuan vdekjen e tij si rezultat të një operacioni, që nuk ishte i sanksionuar nga shteti, duke hequr çdo përgjegjësi nga vetja. Por deklaratat e tyre janë vënë në dyshim në të gjithë arenën ndërkombëtare, përfshirë këtu edhe disa agjenci të inteligjencës dhe Kombet e Bashkuara.
Khashoggi shkruante për gazetën “Washingto Post” dhe përpara vdekjes, ishte zhvendosur për të jetuar në Shtetet e Bashkuara.
Në dhjetor të vitit të shkuar, një gjykatë dënoi me vdekje 5 persona, për rolin e tyre në vrasjen e gazetarit, pas një gjyqi që u mbajt në mënyrë të fshehtë në Riad.
Por përmes një deklarate në Twitter, Salah Khashoggi, një prej djemve të tij, shkroi: “Në këtë natë të shenjtë të këtij muaji të shenjtë, ne kujtojmë shprehjen e Allahut: Në qoftë se një person fal dhe pajtohet, vlerësimet i merr nga Allahu. Kështu, ne, djemtë e martirit Jamal Khashoggi deklarojmë se i falim të gjithë ata që vranë babain tonë”./ Burimi: BBC/ Përshtati: Fjala.al
