Edhe pse në kampionatin anglez të futbollit ende nuk i kanë të qartë disa mekanizma sesi do të rikthehen në fushë duke respektuar protokollin e sigurisë nga pandemia, klubet elitare vazhdojë përgatitjet. Shumë skuadra kanë probleme me lojtarët që nuk dëshirojnë të kthehen pasi kanë frikë, por te Manchester United nuk ekziston kjo çështje.
Trajneri i Manchester United, Ole Gunnar Solskjaer tha se kur kampionati të rikthehet, dy yjet e skuadrës, Marcus Rashford dhe Paul Pogba, do të jenë të gatshëm për të luajtur titullarë.
Mendohej se Rashford e kishte mbyllur sezonin pas një operacioni në shpinë, ndërsa Pogba, nuk kishte figuruar thuajse aspak në formacionin e “Djajve” këtë sezon, për shkak të dëmtimeve të shumta. Por sipas Solskjaer, të dy do të jenë gati.
“Mendoj se Pogba dhe Rashford duken mirë fizikisht dhe janë bashkuar në stërvitje e kanë bërë të njëjtat seanca stërvitore si pjesa tjetër e skuadrës. Kur futbolli të rifillojë, do të kemi një skuadër të plotë dhe të gjithë lojtarët do të jenë të gatshëm për t’u përzgjedhur, çka është një lajm shumë i mirë për mua dhe stafin teknik” tha Solskjaer.
“Lojtarët janë kujdesur për veten dhe e kanë bërë mirë këtë. Charlie Owen, trajneri i fitness, Kieran McKenna, Michael Carrick dhe Martyn Pert i kanë kontrolluar gjatë gjithë kohës. Ata nuk kanë qenë shumë ditë pushim” tha trajneri për kolegët e tij.
