Nisin aplikimet për garancinë e dytë sovrane, huatë që mund të marrin bizneset nga bankat me garant shtetin për kapitale qarkulluese. Lajmi është bërë i ditur nga ministri i Rindërtimit dhe koordinator për hartimin e planit kombëtar të rimëkëmbjes, Arben Ahemtaj.
“Për instrumentin e parë të garancisë sovrane janë miratuar deri 309 aplikime me një vlerë 40 milionë dollarë dhe do të vazhdojë. Ndërkohë garancia e dytë sapo ka nisur, pra me ditë është dhe janë që tani disa dhjetëra aplikime në 12 banka. “Para se ta mbyll, e theksoj që e gjithë përpjekja jonë dhe plani ynë ekonomik nuk do të sigurojë thjesht dhe vetëm që ne mos të kthehemi te 2012-a, por do të garantojmë me reforma, investime publike dhe politika ekonomiko- financiare të suksesshme që të konvergohemi me rritjen e parakrizës në krye të 2 apo 3 viteve, dhe jo ashtu siç përcaktojnë institucionet ndërkombëtare, në krye të 5 viteve.” – tha Ahmetaj.
Gjatë konferencës për shtyp, nga Kryeministria, Arben Ahmetaj foli edhe për vlerësimin e Bankës Botërore për impaktin e mundshëm ekonomik e social. Ahmetaj u shpreh se shumë shpejt qeveria do të ketë planin e qartë për rimëkëmbjen e ekonomisë. Ai shtoi se vendi ka marrë një goditje të fortë, pasi ekonomia ka pësuar rënie dhe nga tërmeti i 26 nëntorit dhe nga pandemia.
“Sipas stimulimeve, vlerësohet se shkalla e varfërisë mund të rritet me 40%, për të shkuar me skenarin e parë, por ajo që mund të ishte më keq mund të ishte 44%. Po dua t’i kujtoj Shqipërisë që në vitin 2012 nuk kishte krizë, por keqmenaxhimi nga qeveria që e zhyti vendin nga ana ekonomike më keq se në vitin 1997. Ne kemi dy goditje në vend në fund të vitin 2019 nga tërmeti dhe pandemia. Ne i shërbyem të gjithë bizinesit të vogël me paketën e parë dhe të dytë”, u shpreh ndër të tjera Ahmetaj.
Dy ditë më parë Banka Botërore publikoi një raport ku evindentonte se Shqipëria është një nga vendet më të cenueshme nga pasojat e COVID-19. Sipas BB-së, shkalla e papunësisë pritet të arrijë nga 40% që është sot, deri në 48% (numri i personave që jetojnë me më pak se 5,5 dollarë në ditë, sipas fuqisë blerëse).
Sipas raportit të Bankës Botërore, që vlerëson se si COVID-19 “mund të ndikojë në varfërinë dhe mirëqenien e familjeve në Ballkanin Perëndimor”, veçanërisht të rrezikuar janë personat e vetëpunësuar, me punësim informal dhe ata me punë të përkohshme, ose me kontrata jo shumë të sigurta.
