Përplasjet në futboll mes lojtarëve shqiptarë dhe atyre serbë u pasuruan më shumë këtë javë, por në kontrast me konfliktin me grushte të Eros Grezdës me Antonio Colak në Kroaci, këtë herë dozat kanë qenë miqësore. Mesfushori serb i Lazios, Sergej Milinkoviç-Saviç pati një përplasje me portierin shqiptar të bardhekaltërve, talentin Marco Alia dhe ndërpreu menjëherë seancën stërvitore pasi ndjeu shqetësime në gju.
Mesfushori ofensiv serb pret me ankth rezonancën magnetike, për të parë shkallën e dëmtimit, ndërsa trajneri Inzaghi do të analizojë rezultatet, duke qenë se Milinkovic-Savic është një element mjaft i rëndësishëm për skuadrën e tij. Paraprakisht mjekët e Lazios janë shfaqur optimistë, pasi kanë deklaruar se dëmtimi nuk mund at lërë më shumë se dy javë pushim mesfushorin serb, gjithsesi fjalën e fundit do ta thotë ekzaminimi këtë fundjavë.
Lazio vijon përgatitjet për pjesën e mbetur të sezonit 2019-2020, pasi momentalisht renditet në vendin e dytë dhe do të provojë deri në fund të rimarrë kreun e të fitojë titullin kampion, që mungon prej 20 vitesh. Talenti i portës, Marco Alia është një nga elementë që kanë spikatur tek të rinjtë e Lazio me mbështejen e shqiptarit që mban postin e Drejtorit Sportiv, Igli Tare.
