Pas deklaratës së kryeministrit Rama se marrëveshja e djeshme tregoi se humbja e PD-së në vitin 2017 konfirmoi se nuk kishte lidhje me integritetin e zgjedhjeve ka ardhur dhe reagimi i parë nga Partia Demokratike.
Sekretari i Përgjithshëm i kësaj force politike, Gazment Bardhi i ka kujtuar kreut të qeverisë përgjimet e gazetës gjermane “BILD” dhe thotë se për zgjedhjet e vitit 2017 Rama nuk ka për t’i shpëtuar kushtit nr.5 të BE, ai për hetimin dhe dënimin e hajdutëve të votave.
Sipas Bardhit, marrëveshja e djeshme për kodin e ri, i çmontoi Edi Ramës kapjen e komisioneve zgjedhore.
Postimi i plotë në Facebook:
Edi Rama bën mirë të rrisë dozën e qetësuesve për të mbajtur nën kontroll nervozizmin pas tërheqjes me bisht ndër shalë nga skema mafioze për kapjen e komisioneve zgjedhore.
Frika dhe mllefi sot dhe mbrëmë tregon qartë se nuk i mjaftojnë më as paratë e pista dhe krimi i organizuar për të vjedhur zgjedhjet. Bashkimi i qytetarëve kundër tij e ka tmerruar, duke e kthyer në një komentator qesharak, që flet me veten!
Sa për vjedhjen e zgjedhjeve e 2017-ës, Edi Rama nuk do ketë më mundësi t’i fshihet kushtit nr.5 të BE për hetimin dhe dënimin e hajdutëve të zgjedhjeve të 2017-ës. Përgjimet e publikuara nga BILD i ka dëgjuar bota mbarë, që nga Niçja i drogës tek Gjushi i Ramës, i shpallur non grata nga SHBA.
PD dhe Opozita e Bashkuar nuk tërhiqet asnjë hap nga presioni dhe kurthet e Edi Ramës. Mbrëmë i çmontuam kapjen e konisoneve zgjedhore. Bashkë me shqiptarët do të mbrojmë çdo votë dhe do të fitojmë! ✌️#ditëmëtëmira
/E.B./Fjala.al
