Hashim Thaçi, presidenti i Kosovës ka deklaruar se nëse vijon të rritet numri i të infektuarve me koronavirus, institucionet shëndetësore do të rikthejnë sërish masat kufizuese.
Në një konferencë për mediat, Thaçi i bëri thirrje qytetarëve që të respektojnë rekomandimet e Institutit Kombëtar të Shëndetësisë Publike në Kosovë, në mënyrë që të mos përhapet më shumë virusi COVID-19.
Hashim Thaçi: “Kemi rritje të numrit të infektuarve, kjo rrezikon krejt atë që ne e kemi arritur deri më tani, rrezikon ta përmbysë punën e mrekullueshme që kanë bërë mjekët, gjithë ata profesionistë që punuan natë e ditë në mënyrë që ta kalojmë më lehtë pandeminë. Përsëris rekomandimet që të mbahet distanca, të mbajmë maskat, sepse vetëm kështu ruajmë jetën tonë dhe jetën e të afërmeve tonë. Institucionet e shtetit do të detyrohen të kthejnë masat për të parandaluar përhapjen e pandemisë. Kjo do ta dëmtojë shëndetin dhe ekonominë”.
Aktualisht, në Kosovë numërohen 1,234 të infektuar dhe 31 viktima./Fjala.al/k.l
