Situata e infektimeve në vend është përkeqësuar ditën e sotme, ku në orët e fundit janë raportuar 36 infektime, shifra më e lartë qysh nga nisja e pandemisë së koronavirusit. Prej tyre 27 i përkasin Tiranës.
Lidhur me këtë situatë ka reaguar edhe Profesori Ethem Ruka, i cili në një status në Facebook ka analizuar ditët me infektimet më të larta nisur që nga 9 marsi kur u konstatuan dhe rastet e para me koronavirus.
Ndëtr të tjera Ruka shprehet se nëse infektimet në vendin tonë vazhdojnë me të tilla shifra, atëherë rrezikojmë të kalojmë sërish në kushte izolimi social.
“Përkeqësohet situata e pandemisë në vendin tonë. Sot numri i të infektuarve (36 individë) është më i larti ndër të gjitha ditët nga 9 marsi e deri më sot.
Ditët me më shumë infektime kanë qenë më 4 prill me 29 infektime, më 5 prill me 28 infektime, më 23 prill me 29 infektime dhe me 25 prill me 34 infektime. Sot është dita kur numri i të infektuarve aktivë (305 individë) është më i larti që nga dita e parë e pandemisë në vendin tonë.
Situata po përkeqësohet. Duke parë ecurinë e infektimeve ditët e fundit, vihet re një tendencë në rritje. Duke krahasuar datën 24 maj me atë 9 qershor numri ditor i të infektuarve aktivë është rritur 58%. Kjo rritje është alarmante”, shkruan Ruka.
Sipas tij, “Nëse do të vazhdohet kështu ka rrezik të kalojmë sërish në kushte izolimi social. Niveli i ndërgjegjësimit ka rënë dukshëm, njerëzit i janë kthyer jetës së përditshme dhe për fat të keq mendojnë se Covid 19 është një lojë për të trembur qytetarët dhe se fuqia e virusit ka rënë. Ju ftoj të komentojmë së bashku!”
Kujtojmë se nga fillimi i epidemisë janë kryer mbi 18500 testime molekulare dhe serologjike dhe janë konfirmuar pozitivë 1299 raste.
Shpërndarja gjeografike e rasteve aktive është Tiranë 204; Shkodër 29; Krujë 24; Kamëz 19; Durrës 10; Mat 9; Lushnje 4; Tropojë 2; Korçë 1; Librazhd 1; Mallakastër 1 dhe Lezhë 1.
COVID-19 – Statistika 9 Qershor 2020
Testime totale 18960
Testime molekulare 16716
Testime serologjike 2244
Raste pozitive 1299
Raste të shëruara 960
Raste Aktive 305
Humbje jete 34 (Qarku Tiranë 21, Durrës 6, Fier 3, Vlorë 1, Shkodër 2, Kukës 1)/b.b/fjala.al
