“Shqipëria është pjesë e disa lojërave dhe grupeve lobiste qoftë në Washington, qoftë në Bruksel, të cilat kanë qenë pro politikave Serbe” Kjo është deklarata e fortë e kryetares së LSI-së Monika Kryemadhit, e cila hedh akuza ndaj ndërkombëtarëve.
Ajo deklaroi në emisionin “Real Story” se situata në rajon është problematike dhe e di shumë mirë se cila do të jetë e ardhmja e Ballkanit.
“Mos të harrojmë që ndërkombëtarët budallenj nuk janë, kanë edhe ata interesat e tyre dhe humbja e terrenit në Shqipëri është jashtëzakonisht e madhe. Situata në të cilën po kalon rajoni është problematike dhe ne e dimë shumë mirë se cila do të jetë e ardhmja e Ballkanit. Kur ndërkohë, shqiptarët janë i vetmi popull pro-amerikanë, pro-europianë në Ballkan. Ndërkohë që të tjerët janë me dilema shumë të forta, mund të themi edhe me dilema komplet të ndryshme. Nëse ky popull do të fillojë dhe do të deziluzionojë, do të zhgënjehet ndaj çdo vendi që prej 30 vitesh ka marrë pilulat e demokracisë, të fjalës së lirë, të sistemit të drejtësisë e me radhë, në një moment të caktuar kur nuk bëhet flagrante, një recepsionist merr 30 milionë euro po themi për një rrugë apo 12 milionë euro të tjera dhe akoma nuk është kapur recepsionisti. Të gjitha këto pastaj krijojnë një efekt që njerëzit thonë ‘Boll sepse ne me të vërtetë jemi të varfër, me të vërtetë jemi të vegjël, me të vërtetë jemi të pafuqishëm por ti nuk mund të më shkelësh me këmbë.”. Kështu që automatikisht vjen një moment që ky lloj reagimi sjell. Dhe, nga ana tjetër faktikisht situata ndërkombëtare qoftë në BE, qoftë në Amerikë, ka bërë që Shqipëria të jetë edhe pjesë e disa lojërave dhe të grupeve lobiste qoftë në Washington, qoftë në Bruksel të cilat kanë qenë pro politikave Serbe për të krijuar ekspancionin e politikave Serbe dhe të tregut Serb në rajon dhe në Ballkan.” tha Kryemadhi./E.B./Fjala.al
