Gjysma e sportristëve me ngjyrë anembanë globit u solidarizuan këto ditë me vdekjen tragjike të George Floyd, i vrarë nga policia e Minneapolis gjatë një arrestimi. Por nëse gjunjëzimi karakteristik në njërën këmbë, si mënyrë për të ngritur zërin për diskriminimin, u lejua nga federatat e futbollit, në olimpiadë, kjo nuk do lejohet.
IOC ka informuar se atletët nuk do të lejohen të protestojnë në “Tokyo 2020”, Lojërat e programuara këtë verë që u spostuan vitin tjetër për shkak të pandemisë. IOC pretendon se do të zbatohet neni 50 i kartës Olimpike, sipas të cilit “asnjë lloj demonstrimi ose propagandimi politik, fetar ose racor nuk lejohet në asnjë shtet, Federatë apo zonë tjetër” .
Qëndrimi i përmbledhur nga “The Telegraph”, vjen pasi disa sportistë u gjunjëzuan kundër racizmit në protestë për vdekjen e George Floyd. Komiteti Olimpik Ndërkombëtar ka bërë të ditur që atletët që shkelin këtë rregull, do të pësojnë procedura disiplinore, rast pas rasti dhe deri në përjashtim.
Ndalimi i IOC përfshin gjeste të tjera, jo vetëm “gju në tokë”, por, për shembull, edhe krahun drejt qiellit me grusht të shtrënguar, një gjest i bërë i famshëm në Meksikë 1968 nga sprinterët “me ngjyrë” amerikanë Tommie Smith dhe John Carlos, të cilët përkulën në podium kokën dhe ngritën grushtin për të protestuar kundër racizmit. (fjala.al)
