Ministrja e Arsimit në Shqipëri, Besa Shahini ka përkujtuar sot 21-vjetorin e çlirimit të Kosovës.
Në një postim në ‘Facebook’, Shahini shprehet se nuk duhet të harrohet kurrë se falë kujt shqiptarët janë duke festuar sot këtë ditë.
Ministrja e Arsimit kujton se si fëmijë e kishte shumë të vështirë të imagjinonte paqen në Kosovë. Por ajo thotë se sot pas 21 vitesh jo vetëm ka mbijetuar, por shërben në qeverinë e Shqipërisë si shenjë e qëndresës dhe bashkimit kombëtar.
Postimi i plotë:
Sot e 21 vite më parë, isha refugjate në Kanada kur mora lajmin që kishin pushuar bombardimet e NATO-s dhe trupat këmbësore ishin futur në Kosovë. Kosova ishte çliruar!
Si fëmijë që kishte parë vetëm konflikt dhe luftë, e kisha të vështirë ta paramendoja paqen dhe lirinë në Kosovë dhe gjithë potencialin që ngërthente ajo liri për popullin tonë. Sot, jo vetëm kam mbijetuar luftën 21 vite më parë, por jam duke shërbyer në qeverinë e Republikës së Shqipërisë, si shenjë e qëndresës dhe bashkimit tonë kombëtar.
Por, kjo liri që gëzojmë sot, qëndron mbi mijëra jetë të humbura e shumë e shumë të tjera të shkatërruara. Ndaj, mos të harrojmë kurrë falë kujt po e gëzojmë këtë ditë dhe të përkujtojmë me përulësi se sa e brishtë është liria dhe sa shumë duhet të përpiqemi ta mirëmbajmë dhe gëzojmë atë, duke dashur njëri-tjetrin dhe duke bërë çdo ditë nga pak që të lëmë një vend më të mirë për fëmijët tanë.ka.ta/Fjala.al/
