Nëse pandemia do ta lejojë që titulli kampion në futbollin spanjoll të caktohet ën fushën e blertë, do të jetë vërtet një luftë e bukur. Barcelona kryeson por ndjen presionin e Realit të Madridit pas krahëve, pasi “blancos” tani janë sërish 2 pikë larg pas suksesit 3-1 kundër Eibar.
Në më pak se 4 minuta lojë, mesfushori gjerman Toni Kroos i tregoi miqve se çfarë i priste pasi një “e brendshme” surprizuese pushoi në rrjetën e Eibar dhe i dha avantazhin Realit. Goli i dytë erdhi në një zbritje të rrufeshme në ofensivë që gjeti skuadrën mike zbuluar në prapavijë, e i dha Ramos gëzimin e shënuesit. Braziliani Marcelo shënoi pa shkuar në pushim golin e tretë, duke e kthyer në makth, ndeshjen e portierit serb Marko Dmitrovic.
Eibar arriti të shënojë golin e nderit me Bigas, por vetëm kaq. Tani Real Madrid ka 59 në 28 ndeshje të zhvilluara, dy pikë më pak se Barcelona kryesuese, dhe 9 më shumë sesa Sevilla e vendit të tretë.
