Edhe për rektorin e universitet të mjekësisë në Tiranë, mjekun Arben Gjata shtimi i numrit të të infektuarëve me COVID-19 ishte e pritshme, por sipas tij është një rritje më e lartë sesa parashikimet.
Gjatë një interviste për emisionin “5 pyetjet nga Babaramo”, mjeku deklaroi se relaksimi i shqiptarëve, por edhe i personelit mjekësor ishte një nga arsyet kryesore të përhapjes në masë të koronavirusit. Por pavarësisht shifrave të larta, Arben Gjata nuk beson në rikthimin e masave kufizuese.
“Pas hapjes, fillimet të aktiviteteve pritej një rritje dhe kjo rritje ndodhi, por është një rritje më e lartë sesa parashikimet. Kjo tregon që nuk janë duke u zbatuar masat, distancimi social, mbajta e maskave etj. Pati një lloj relaksimi të shoqërisë pas hapjes. Unë besoj që kjo është arsye kryesore. Virusi ka qenë gjithmonë këtu nuk ka ikur. Virusi është duke u përhapur dhe kjo është në dorë të qytetarëve. Duhet të zbatojmë rekomandimet që mos ndodhemi në situatë të papëlqyeshme.
Nuk besoj që do kthemi në karantinë. Unë shpresoj që shqiptarët të ndërgjegjësohen. Njerëzit, por jo vetëm njerëzit dhe personeli shëndetësor patën një relaksim. U duk sikur virusi iku. Por duhet të mësohemi me normalitet të ri, jo me normalitetin e dikurshëm”, deklaroi Gjata./En.Br./Fjala.al
