Më 27 qershor do zhvillohen diskutimet për dialogun Kosovë-Serbi në Shtëpinë e Bardhë në Washington. Lajmin e ka bërë të ditur i dërguari i posaçëm i SHBA-së për dialogun, Richard Grenell përmes një postimi në Twitter.
Ai ka bërë të ditur gjithashtu se i është premtuar ndalja e fushatës së çnjohjes së Pavarësisë së Kosovës.
“Lajm i madh. Kam marrë zotimin nga qeveritë e Kosovës dhe Serbisë që përkohësisht ta pauzojnë fushatën e mosnjohjes dhe kërkesën për anëtarësim ndërkombëtar në mënyrë që të takohen në Washington, në Shtëpinë e Bardhë më 27 qershor për të biseduar rreth dialogut. Siç e kemi thënë në vazhdimësi, së pari duhet të bëjmë progres në rritjen ekonomike. Ky është fokusi. Shikoj përpara për këto bisedime”, ka shkruar Grenell./En.Br./Fjala.al
