Pak javë më parë refuzoi edhe zyrtarisht rinovimin e kontratës duke i bërë me dije drejtuesve se nuk do luajë më në Kategorinë Superiore, por ndoshta kur të largohet, Kukësi do të “qajë” sulmuesin Vasil Shkurtaj. Futbollisti ishte protagonist në ndeshjen e zhvilluar në stadiumin Elbasan Arena, aty ku shënoi 3 nga 4 golat e verilindorëve ndaj Flamurtarit.
Në 90 minutëshin ku skuadra vlonjate ishte thuajse një hije dhe e varfëruar nga të gjithë objektivat, as nuk denjoi edhe të “respektojë” kampionatin. Pas “sllallomit” të bukur të Kristal Abazajt që në minutën e tretë, skena i kaloi Shkurtajt që shënoi 3 herë. Mes golave të tij edhe “flamuri” i nderit për vlonjatët me rrjetën e Hoxhajt, nga një pozicion i lehtë pranë vijës fatale të portës, por shumë pak që Flamurtari të merrte një pikë gjithsesi pa vlerë. 4-1 për armatën e veriut dhe skuadrën e trajnerit Orges Shehi, që tani janë po të dytët por me 53 pikë pas 29 ndeshjesh.
Vllaznia barazoi 2-2 me Bylis në 90 minutëshin ku ata pak staf dhe gazetarë u trembën nga dëmtimi i Hadroj, që fillimisht u mendua për më të keqen pasi humbi ndjenjat, por fatmirësisht nuk pati pasoja edhe pse u dërgua me ambulancë në spital, pas një kontrasti me Markun. Penallti për Bylisin mes polemikave të kuqebluve që nuk evituan dot disavantazhin dhe barazim nga Gurishta. Sërish ballshiotët ishin ata që morën epërsinë me uruguajanin Mozzone, por 6 minuta nga fundi, Sidorenko i dha një pikë vendasve. Tani situata e rrezikshme e “Play Out” vendos Vllazninë në zonë të kuqe, pasi Bylis është një pikë më shumë, plot 40. (fjala.al)
