Gjykata e Tiranës ka lënë në burg 6 personat e arrestuar tre ditë më parë, pasi tentuan të vidhnin banesën e një biznesmeni. Pjesë e grupit të grabitësve ishin edhe punonjësi i gardës Aleks Kala dhe një punonjës Banke, Andi Kraja.
Nga hetimet e prokurorisë ka rezultuar se tre prej grabitësve kanë hyrë në banesën e biznesmenit për të kryer grabitjen me shkallë. Pasi janë futur në banesë, ata janë përleshur edhe me pronarin e shtëpisë, i cili ka arritur ti marrë pistoletën njërit prej tyre.
Pas këtij momenti grabitësit janë larguar nga banesa dhe të nesërme kanë marrë në telefon duke e kërcënuar dhe shantazhuar. Pronari i banesës i cili njihet me pseudonimin “Boli”, pas telefonatës kërcënuese që mori ka bërë kallëzim në polici. Menjëherë pas denoncimit, policia nisi hetimit dhe identifikojë grabitësit duke i vënë ata në pranga.
Identifikimi i tyre është bërë përmes telefonatës kërcënuese që njëri prej grabitësve i bëri pronarit të banesës. Sipas dosjes së prokurorisë, nga hetimet paraprake dyshohet se pronari i banesës dhe grabitësit kanë pasur njohje mes tyre.
Kjo përforcohet edhe nga dëshmia e njërit prej grabitësve, i cili përpara grupit hetimor deklaroi se kishin shkuar në banesën e “Bolit”, për të vjedhur 4 kg kokainë.
Sot togat e zeza të kryeqytetit lanë në burg me akuzën e “tentativë vjedhjeje me dhunë”: Spartak Qokun, Petro Savën, Andi Krajën, Aleks Kalën, Emel Hajdarajn dhe Klaudio Metajn. Ata do të qëndrojnë në qeli të paktën deri në përfundim të hetimeve, ndërkohë që prokuroria po punon intensivisht për zbardhjen e plotë të kësaj ngjarjeje.ka.ta/Fjala.al/
