Më në fund procesi i regjistrimit të pronave në jug do të mbyllet. Lajmin e ka bërë të ditur Kreu i Kadastrës, Artan Lame.
Në një dalje për mediat, Lame lëshoi kritika të forta kundrejt shtetit shqiptarë, që sipas tij, prej 30 vitesh nuk është në gjendje të mbyllë problemin e pronave.
Lame sqaroi edhe hapat që do të ndiqen, që nga marrja e informacioneve në terren, e deri te dhënia e certifikatave të pronësisë qytetarëve.
Fjala e plotë
“Ka 30 vjet që shteti shqiptar, ku më shumë e ku më pak, nuk ka qenë në gjendje të mbyllë problemin e pronave, kryesisht në jug. Janë gjithë zonat kadastrale të bregdetit të jugut ende të paregjistruara. Dy herë është nisur ky proces, të dyja herët ka dështuar. Njëherë u nis dhe u la në mes, herën tjetër u çua më tej, por u la sërish, edhe pse ishte me financime të huaja.
Ju them me bindje se kjo do të jetë hera e tretë ku procesi i regjistrimit të pronave në jug do të përfundojë. Por, ky proces nuk mund të bëhet pa u bërë të gjithë bashkë. Po nuk u krijua fryma e bashkëpunimit dhe fryma që shteti, me gjithë problemet që mund të ketë, e ka marrë seriozisht këtë, nuk mund të shkojë përpara. Besoj që do të mbyllet në këto muaj që është lënë si proces.
Për rreth dy-tre muaj ne do të vazhdojmë me grupet në terren për të bërë mbledhjen e informacionit, pastaj do të përpunohet në zyrat tona dhe do të shfaqet për dy-tre muaj të tjerë pranë gjithë zyrave tona në bregdetin e jugut dhe do t’i lihet afat dy-tre muaj çdo qytetari të shohë si është pasqyruar prona e tij.
Do të kemi tre kategori, o qytetarë që kanë pronën e pastër dhe do të marrin certifikatën e pronësisë, o qytetarë që kanë probleme me njëri-tjetrin dhe arrijnë ta gjejnë zgjidhjen me njëri-tjetrin dhe do të regjistrohen të dy palët dhe do të marrin certifikatën, o qytetarë që kanë probleme me njëri-tjetrin dhe nuk e gjejnë zgjidhjen dhe do iu thuhet të shkojnë në gjykatë”
Bo.Ba/fjala.al
