Nga kolonat e gazetës italiane Corriere dello Sport, trajneri Claudio Ranieri e ka ka cilësuar kampionatin e këtij sezoni si të falsifikuar. Në diskutimin për rifillimin e Serisë A, tekniku roman ka thënë se skuadrat e prekura nga pandemia, do jenë më të disavantazhuara.
“Do të jetë një kampionat i shtrembëruar, anomal, por duhet të përfundojë për shkak të forcës madhore. Pra, le ta përfundojmë dhe të shikojmë se ku do shkojmë. Kemi edhe dy muaj shumë intensivë përpara. Sampdoria ishte një nga skuadrat më të prekura nga virusi. Unë shoh këta djem që janë duke luftuar më shumë se të tjerët për tu rikuperuar, e mund të mos ishte kështu nëse nuk do goditeshim nga Covid-19” tha Ranieri.
Trajneri roman shpreson që tifozët të jenë në gjendje të rikthehen sa më shpejt në stadiume.
“Fillojmë futbollin përsëri dhe do shohim se çfarë ndodh, por pa tifozët do të jetë e tmerrshme. Publiku në një lojë futbolli është gjithçka. Pasja e tifozëve pranë nesh do të ishte e rëndësishme për sigurinë pavarësisht të gjithave. Shpresoj se ata mund të kthehen shpejt: Të luash me dyer të mbyllura është si një shfaqje teatri pa një audiencë” tha Ranieri. Samp i tij është në pritje të një konfrontimi shumë të vështirë të dyfishtë, së pari me Interin dhe më pas me Romën.
