Presidenti i vendit, Ilir Meta, nuk ka kryer asnjë shkelje në emërimet për Gjykatën Kushtetuese. Kështu paraqitet në një pjesë të draftit të opinionit të Komisionit të Venecies, ku nënvizohet se veprimet e presidentit janë të justifikuara dhe të arsyeshme.
Në draft duket qartazi që Komisioni i Venecies i jep të drejtë presidentit Ilir Meta, lidhur me emërimet e kryera në Gjykatën Kushtetuese.
Pavarësisht se Meta pezulloi në mënyrë të njëanshme procedurën e emërimit, para skadimit të afatit 30-ditor, Komisioni i Venecies argumenton se një pezullim i tillë ka për qëllim plotësimin e boshllëkut ligjor që ndodhi me Gjykatën Kushtetuese.
“Presidenti, përmes aktit të tij të 5 nëntorit 2019, pezulloi në mënyrë të njëanshme procedurën e emërimit para skadimit të afatit 30-ditor, të përcaktuar në ligj. Ndërsa një pezullim i tillë nuk parashikohet në mënyrë eksplicite nga ligji për Gjykatën Kushtetuese, ai mund të jetë në përputhje me një mekanizëm zhbllokues që ka për qëllim zhbllokimin e një situate, kur ka mosveprim ose vullnet dashakeq nga njëri prej aktorëve të përfshirë”, thuhet në raport.
Më tej në raportin e publikuar, Komisioni i Venecies e quan të justifikueshëm emërimin nga presidenti të kandidates së dytë, kurse refuzimin nga presidenti të betimit të Arta Vorpsit e quan të arsyeshëm.
“Nëse nuk ka as vullnet dashakeq dhe as mosveprim, por përkundrazi duhet të plotësohet një boshllëk ligjor, ratio legis i mekanizmit zhbllokues, nuk do të ishte i zbatueshëm. Si pasojë, do të duhet të ekzistojë mundësia për të ndërprerë funksionimin – përndryshe automatik – të mekanizmit zhbllokues. Ndaj, në bazë të një interpretimi teleologjik të dispozitave ligjore, është e justifikueshme të pranohet emërimi i mëvonshëm i një kandidati të dytë nga presidenti”, thuhet në raport, teksa theksohet se duket e arsyeshme që presidenti refuzoi të pranonte betimin e gjyqtares që pretendon se u emërua automatikisht./Fjala.al/Ke.Ba
