Partia Përparimtare Serbe e drejtuar nga presidenti i Serbisë Aleksandër Vuçiç ka fituar sërish zgjedhjet duke marrë kështu mandatin e tretë.
Mediat serbe raportojnë se Partia Përparimtare Serbe (SNS) e Vuçiçit ka triumfuar me 62,5 % të votave.
Ndërsa e dyta më e votuar ka dalë Partia e Socialiste e Serbisë (SPS) e ministrit të jashtëm Ivica Daçiq me 10,7 %.
Në rezultatet e marra nga votimi del që në Kuvendin e Serbisë SNS e Vuçiçit do të ketë 180 deputetë, ndërsa Daçiqi 30 deputetë.
Në lidhje me këto rezultate presidenti serb u shpreh se kurrë nuk e ka ndjerë kaq shumë një fitore.
“Në politikë jam qe një kohë të gjatë, por kurrë nuk e kam përjetuar një moment të tillë. Sonte kam fituar besim të madh nga populli në kushte kur pak njerëz kanë besuar. Morëm një paralajmërim të madh nga njerëzit se duhet të jemi më të përgjegjshëm, të kujdesshëm dhe të zellshëm,”-ka thënë Vuçiç.
Nga ky votim koalicioni shqiptar Alternativa Demokratike Shqiptare, Lugina e Bashkuar ka marrë 7,39 % të votave dhe do të ketë katër deputetë.
Serbia bëhet kështu vendi i parë në Europë që zhvillon zgjedhjet gjatë pandemisë.ka.ta/Fjala.al/
