Gjykata e Posaçme e Apelit pritet të japë ditën e sotme vendimin për ish-ministrin e Brendshëm Saimir Tahirin dhe seanca pritet të nisë në orën 09:30
Në seancën e fundit e cila zgjati rreth 6 orë, prokurorët Vladimir Mara dhe Dritan Prenci nuk u tërheqën nga akuzat për trafikimin ndërkombëtar të lëndëve narkotike dhe dënimi me 12 vite burg që kërkuan në Shkallën e Parë, ndërsa Saimir Tahiri dhe avokati i tij Maks Haxhia kishin përgatitur një mbrojtje prej 131 faqesh.
Trupa gjykuese përbëhet nga Albana Boksi, Nertina Kosova dhe Dhimitër Lara, ku ky i fundit zëvendësoi gjyqtaren Nure Dreni të shkarkuar nga procesi i vettingut.
Tahiri u dënua me 5 vite burg, vitin e kaluar, të konvertuara me gjykim të shkurtuar në 3.4 vite shërbim prove dhe dënimi u dha për akuzën “shpërdorim detyre”.
Prokuroria e Krimeve të Rënda nga ana tjetër kërkonte 12 vite burg për Tahirin për 3 vepra penale “trafikim i narkotikëve i kryer në bashkëpunim në formën e grupit të strukturuar kriminal”, “kryerja e veprave penale nga organizata kriminale”, “grup i strukturuar kriminal”.
Si përfundim të dyja palët, si Tahiri dhe Prokuroria nuk pranuan dënimin me 3.4 vite shërbim prove dhe e apeluan zyrtarisht në Gjykatën e Posaçme të Apelit.
Prokuroria e akuzonte Tahirin se në kohën kur ishte ministër i brendshëm bashkë me ish- drejtorin e Policisë Vlorë, Jaeld Çela kanë bashkëpunuar me Moisi Habilajn apo vëllezërit e tij që bashkë korrespondojnë të jenë kushërinj.
Mbetet me interes vendimi i Apelit për të parë se kujt do t’i japë të drejtë./En.Br./Fjala.al
