Deputeti Myslim Murrizi ka kërkuar rikthimin e normalitetit në parlament, pasi gjendja e jashtëzakonshme ka përfunduar prej dy ditësh.
Teksa në parlament po raportonte kreu i KLP-së, deputetët e opozitës kërkuan fjalën për të bërë pyetje, por nuk u lejuan nga Ruçi. Kjo solli edhe reagimin e deputetit Murrizi.
“Gjendja e Jashtëzakonshme ka mbaruar, sot kemi dy ditë që i gjithë vendi nuk është më në gjendje të jashtëzakonshme. Ndaj do doja që Kuvendi të kthehej në normalitet, deputetët të merrnin kohën e mjaftueshme për të folur.
Nëse vijmë e dëgjojmë 10 minuta cilindo titullar dhe nuk kemi të drejtë për të pyetje, duhet të kishin kohë të mjaftueshme të gjithë deputetët të flisnin.
Ndaj kërkoj të mblidhet sa më parë Konferenca e Kryetarëve dhe të kthehemi në gjendje normale. Sa më shumë t’ia kufizosh të drejtën për të folur një njeriu, aq më shumë i shtohet oreksi për të folur”, tha Murrizi.
Ndërkohë Ruçi pranoi se gjendja e jashtëzakonshme ka përfunduar. “Sigurisht gjendja e jashtëzakonshme ka përfunduar. Do mbledhim konferencën e kryetarëve për të adresuar shqetësimin tuaj”, tha Ruçi./Bl.Ba/Fjala.al
