Detaje të reja janë zbardhur për dy pistoletat e gjetura mëngjesin e sotëm prapa ambienteve të spitalit “Amavita” në Tiranë.
Besohet se ato i përkasin dy personave që kanë qëndruar si roje, për të garantuar sigurinë e të plagosurit Eduard Lama. Këta persona besohet se janë larguar me shpejtësi duke braktisur dhe armët që kishin me vete, sapo kanë vënë re prezencën e policisë së Tiranës, në ambientet e spitalit privat Amavita, ku ndodhej i shtruar Eduard Lama.
Largimi i tyre është bërë pa u vënë re nga policia, ndërkohë që sot njëri nga njerëzit që shërbente si punëtor në këtë zonë, ka konstatuar praninë e dy armëve të zjarrit dhe menjëherë ka njoftuar policinë e Tiranës, ku dhe ka dhënë sqarime mbi rrethanat se si i ka gjetur armët.
Ndërkohë policia dhe prokuroria e Laçit pohojnë se dy armët nuk janë përdorur në ngjarjen ku mbeti i vrarë Bujar Hasani dhe Paulin Gjegji, pasi në këtë vendngjarje janë gjetur gëzhoja automatiku që ka përdorur Eduard Lama dhe gëzhojat e pistoletës “Glock”, që ka përdorur Bujar Hasani.
Grupi i hetimit dyshon shumë se dy armët i përkasin personave që kanë shërbyer si roje pranë spitalit “Amavita”, me qëllim garantimin e sigurisë së Eduard Lama, që kishte shkuar aty fshehtas për tu kuruar.
Policia ka kërkuar pamjet filmike të spitalit por edhe të bizneseve për rreth me shpresën e identifikimit të dy personave që kanë qëndruar të armatosur jashtë spitalit, gjatë ditëve kur Eduard Lama, ka qenë i shtruar dhe po kurohej në spitalin privat./En.Br./Fjala.al
