Dalin përgjigjet për 15 tamponë të analizuar në Pogradec, ku 3 prej tyre kanë dalë pozitivë.
Kështu, në total numri i të prekurve momentalisht në Pogradec shkon 13. Mësohet se 3 rastet e reja kanë pasur kontakte në Tiranë.
Ndërkohë burime për “Fjala.al” bëjnë me dije se 12 persona janë konfirmuar me Covid-19 edhe në zonën e Krujës. Mësohet se gjatë orëve të fundit në Krujë janë marrë dhjetëra tamponë për të kryer analizat dhe 12 prej tyre kanë rezultuar pozitivë.
Mësohet se gjendja e tyre shëndetësore është e mirë për momentin dhe se asnjë prej tyre nuk ka simptoma të rënda.
Ndërkohë në rang vendi është përkeqësuar situata. Ministria e Shëndetësisë njoftoi sot se gjatë orëve të fundit kanë humbur jetën edhe 3 persona të tjerë. Në total numri i viktimave ka shkuar në 69.
Po kështu janë konfirmuar edhe 82 raste të reja me Covid-19 gjatë 24 orëve të fundit. Aktualisht në spitalin Infektiv po marrin mjekim 78 pacientë, 9 prej tyre janë në terapi intensive, ndërsa 2 janë të intubuar.
Që nga nisja e pandemisë deri sot më janë konfirmuar 2662 të infektuar, nga të cilët 1559 janë shëruar, ndërsa 1103 janë të infektuar aktivë./Bl.Ba/Fjala.al
