Zbardhet skema e mashtrimit online, ku dy ditë më parë u arrestuan 9 persona dhe një tjetër u shpall në kërkim. Të arrestuarit në bashkëpunim me njëri-tjetrin përfituan 38 mijë euro duke mashtruar persona të ndryshëm me anë të rrjeteve sociale.
“Më duhet X lekë, mos më pyet për çfarë e kam urgjente, do të të them në një moment të dytë si është puna. Lekët mos mi nis në emrin tim, pasi nuk kam mundësi ti tërheq vetë”, janë këto disa nga metodat që ky grup mashtroi persona të ndryshëm me anë të rrjeteve sociale, nëpërmjet të cilit përfituan plot 38 mijë euro.
Gjithçka zhvillohej në rrjetet sociale dhe viktimat e tyre ishin njerëz të cilët i njihnin dhe e dinin që kishin mundësi për t’ju dhënë shumat e kërkuara.
Burime nga grupi hetimor i thanë “Fjalës” se të mashtruarit mendonin se paratë po ja dërgonin të afërmeve të tyre. Grupi i mashtruesve kishte hakeruar adresat e tyre, të cilët nuk kishin dijeni për shumat e mbërritura dhe lekët përfitoheshin nga grupi i mashtruesve.
Hetimet për këtë ngjarje janë ende në vijim, pasi ka dyshime se pre e këtij grupi kanë rënë edhe persona të tjerë.
Nëntë personat e arrestuar të cilët akuzohen për veprën penale “Mashtrim kompjuterik”, janë shtetasit E. A., 29 vjeç, I. Q., 27 vjeç, A. M., 48 vjeç, A. T., 28 vjeçe, N. Sh., 21 vjeç, E. H., 33 vjeçe, A. Sh., 21 vjeç, A. A., 38 vjeç, E. P., 30 vjeç, të gjithë banues në Tiranë.
Gjithashtu është shpallur në kërkim dhe shtetasi E. K., 21 vjeç, banues në Tiranë.
Nesër të arrestuarit do të dalin përballë gjykatës për tu njohur me akuzat dhe masën e sigurisë që togat e zeza të kryeqytetit do të caktojnë ndaj tyre./Bl.Ba/Fjala.al
