Media greke ka mbuluar gjerësisht vendimin e fundit të ministrit në detyrë për Europën dhe Punët e Jashtme, Gent Cakaj, për pushimin nga puna të stafit të ambasadës së Shqipërisë në Greqi.
Në titujt e lajmeve kryeson shkarkimi i ambasadores Ardiana Hobdari për “shërbime të dobëta”. Gazeta të mëdha elektronike si “Proto Thema”,”in.gr” dhe blog diplomatik www.echedoros-a.gr/ , periskopi ballkanik etj., janë referuar në performancën e dobët dhe shërbimet thuajse jo-ekzistente për komunitetin shqiptar të ambasadores si dhe stafit plotësues të ambasadës.
Gjithashtu, media greke referohet edhe në çështjen e 100 pasaportave të humbura në zonën Thiseo, Athinë, nga makina e ish-konsullit të Janinës, duke supozuar se kjo ngjarje ka luajtur një rol në vendimin e ashpër të ditës së djeshme.
Lidhur me këtë rast, një vit më parë ndaj diplomates shqiptare është dhënë edhe masë disiplinore nga qeveria shqiptare dhe më pas nisja e hetimeve nga Prokuroria pas skandalit të humbjes së pasaportave të emigrantëve shqiptarë në Greqi në mars të vitit të shkuar.
Por pa hum,bur fare kohë, pas këtyre ndryshimeve të fundit qeveria propozoi që ambasadën tonë në Athinë ta drejtojë Luela Hajdaragaj.
Emri i saj ndodhet mbi tavolinën e Presidentit Ilir Meta, i cili duhet të shprehet me dekret nëse i plotëson kriteret apo jo për të përfaqësuar Shqipërinë në shtetin Helen, edhe pse zonja Hajdaragaj nuk ka eksperiencë si diplomate.
Luela Hajdaragaj, vajza e ish-ministrit të jashtëm Luan Hajdargaj, ka qenë në detyrën e koordinatores së Bashkëqeverisjes në Ministrinë e Evropës dhe Punëve të Jashtme.
Hajdaraga ka studiuar në Shtetet e Bashkuara të Amerikës për psikologji dhe është diplomuar për marrëdhënie ndërkombëtare në universitetin e New York Empire State Collage.
Në CV e saj rezulton e se Hajdaraga ka punuar si menaxhere marketing në Uashington, më pas si ndihmës pedagoge, menaxhere, ndërsa kur u kthye në Shqipëri ajo ka qenë menaxhere në Qendrën për të Drejtat e Njeriut në Tiranë, më pas në disa kompani private si dhe së fundmi do të mbajë postin si ambasadore shqiptare në Greqi./Bl.Ba/Fjala.al
