Pas ngjarjes tragjike të ndodhur në Kombinat, ku nënë e bijë u vetëflijuan për tu ringjallur, ka nisur ndërgjegjësimi qytetar për të mos heshtur për raste të tilla.
Në polici ka mbërritur një telefonatë, ku një banor në Tiranë denoncon rastin e një gruaje 51-vjeçare e cila kishte rreth 6 muaj pa u ushqyer dhe nuk dilte nga banesa.
Në videon e publikuar në emisionin “112” nga gazetari Antonio Çakshiri, shihet teksa policia hyn në banesën ku zonja banon dhe i kërkon informacion se sa kohë ka pa u ushqyer.
Ndërkohë 51-vjeçarja, sipas telefonatës të mbërritur në Sallën Operative, kishte rreth 6 muaj që refuzonte ushqimin dhe konsumonte vetëm ujë, ndërsa e pyetur nga uniformat blu, gruaja u shpreh se nuk ushqehej për shkak të problemeve shëndetësore.
Por, gjatë kontrollit nga doktori në banesë gruaja flet për ringjalljen, një fjali mes fjalëve të lidhura pa kuptim, ndërsa burime për policinë bëjnë me dije se në shtëpinë e saj u gjetën libra fetarë, ndërkohë që hetimet vazhdojnë për të zbuluar se cilit sekt fetar i përket./Re.Gu/Fjala.al
