Fillimi i sezonit të 2020-ës në Formula 1 ka qenë mjaft zhgënjyes për skuadrën e Ferrarit.
“Kokëkuqja” pati disa vështirësi dhe nuk e përfundoi siç pritej garën në Austri. Ndonëse talenti i ri i kësaj skuderie, Charles Leclerc zuri vendin e dytë, katër herë kampioni i Formula 1, Sebastian Vettel u rendit i dhjeti.
Gara e dytë e këtij sezoni do të zhvillohet po në këtë shtet, dhe aty makina italiane do të provojë disa modifikime.
Performimi në të njëjtën pistë do të tregojë nëse këto ndryshime do të adaptohen te njëvendëshja italiane dhe nëse do të jenë ato të duhurat apo jo.
Ndryshimet në fjalë ishin parashikuar të bëheshin në garën e Hungarisë pas 2 javësh, por duke parë situatën u vendos të testoheshin në Austri.
Modifikimet që janë kryesisht aerodinamike dhe në telajo, kanë si qëllim t’i japin makinës më shumë shpejtësi në pistë, sidomos në pjesët e drejta të saj.
Së fundmi ka mbërritur dhe pjesa e poshtme e makinës që pritet t’i japë më shumë ekuilibër, si dhe ajo e përparme. Ndërsa pritet të bëhen edhe ndryshime të tjera.ka.ta/Fjala.al/
