Ekspozimi i tepërt dhe i pambrojtur ndaj diellit është një nga faktorët kryesorë të plakjes së parakohshme dhe dëmtimeve të forta të lëkurës. Aplikimi i solucioneve të duhura kundër diellit është hapi i duhur për të mbrojtur lëkurën.
Megjithatë, një proces i tillë kërkon kujdes, sepse gabimet në aplikimin e këtij sistemi mbrojtës mund të bëjnë më shumë dëm. Ajo që duhet të dimë është se dielli e ndihmon organizmin të prodhojë vitaminën D3, që është thelbësore për sistemin imunitar dhe humorin.
Mbrojtje natyrale apo toksike?
Tregu është i stërmbushur me solucione kundër rrezeve ultravjollcë të diellit. Shumica prej tyre ofrojnë një kokteil toksik substancash kimike që e dëmtojnë lëkurën. Sipas ekspertëve të fushës, mbi 75% e të gjithë kremrave të shitur në tregun global përmbajnë toksina, sic mund te jenë:
• Paraben
• Acid Para amino benzoic
• Octyl salicyclate
• Cinoxate
• Phenylbenzimidazole
• Homosalate
• Menthyl anthranilate
• Octocrylene
Solucionet spërkatëse kundër diellit
Këto solucione mbartin rreziqe të fshehura. Sipas ekspertëve, përbërësit e këtyre spërkatësve janë dëmtues për shëndetin nëse kalojnë në rrugët e frymëmarrjes.
Koha e aplikimit të kremit
Kremi kundër diellit duhet vendosur në lëkurë përpara se të dilni nga shtëpia. Shumë njerëz presin deri sa të shkojnë në pishinë ose në plazh që të vendosin kremin mbrojtës dhe e bëjnë atë gjithnjë në nxitim e sipër.
Aplikimi i kremit vetëm gjatë qëndrimit jashtë
Rrezet e diellit prekin lëkurën edhe kur njeriu është në timon ose i ulur pranë një dritareje. Rrjedhimisht, kremi kundër diellit duhet aplikuar çdo ditë rregullisht.
Kujdes me buzët
Shumë njerëz shpenzojnë kohë, para dhe energji për të siguruar një mbrojtje sa më të mirë të trupit nga dielli dhe harrojnë buzët. Edhe ato kanë nevojë për mbrojtje nga rrezet e dëmshme të diellit./Bl.Ba/Fjala.al
