Mjeku i spitalit Infektiv, Pëllumb Pipero duke iu referuar masave anti-Covid-19 të qeverisë deklaroi se virusi nuk ka fasha orari, por lëviz me ne për sa kohë lëvizim në 7 ditët e javë.
Sipas tij, muzika ashtu sikur dielli shëron, por problem janë të rinjtë që janë transmetues të heshtur siç i cilësoi ai.
Pipero deklaroi se nuk e ka lexuar urdhrin e Qeverisë për ndalimin e muzikës pas orës 20:00, por sipas tij mund të shfrytëzohen mjediset e hapura dhe të ketë respektim të protokolleve.
“Virusi lëviz me ne, sa kohë lëvizim në 7 ditët e javës virusi do të lëvizë me ne. Virusi nuk ka fasha orari. Unë besoj se ndalimi i funksionimeve të klubeve të natës dhe muzikës, nuk është qëllim në vetvete, por ka për objektiv frenimin e qarkullimin e virusin mes të rinjve që frekuentojnë lokalet e natës.
Muzika njëlloj si dielli, si ajri, apo mjedisi i hapur shëron. Problemi është se të rinjtë nuk e kanë kuptuar që janë transmetues të heshtur, pasi nuk sëmuren kur infektohen, por e transmetojnë virusin.
Të gjitha lokalet dhe baret, si ditën ashtu edhe natën, duhet të respektojnë protokollet e sigurisë. Klubi i natës është për argëtim. Nuk mund të kërcejmë 2 metra larg njëri-tjetrit. kjo është e dobishme për të frenuar përhapjen e virusit.
Unë nuk e kam lexuar të zbardhur urdhrin e qeverisë, por e kam dëgjuar sikurse e keni dëgjuar edhe ju, që ndalohet muzika pas orës 20:00, jo të mbyllet lokali. Mendoj se mund të shfrytëzohen mjediset e hapura dhe të ketë respektim të protokolleve. Jeta e një qytetari është shumë herë më e rëndësishme se sa një natë argëtimi në fundjavë, që do të jetë një kufizim 2-3 mujor.
U kërkoj të gjithë të rinjve që të bëjnë një sakrificë. Duhet mirëkuptim dhe secili nga ne të bëjë një sakrificë. Edhe kostoja ekonomike do të jetë e rëndë. Prandaj duhet mirëkuptim nga gjithë qytetarët. Askund nuk do të ketë mbyllje nëse respektohen protokollet.” tha Pipero në “Ora News”.
/En.Br./Fjala.al
