Partia Demokratike, ka kaluar fazën e parë të hapjes së saj, duke mbledhur gati 2 mijë emra kandidatësh për deputetë nga baza e partisë. Kjo listë do t’i shërbejë për të vijuar më tej demokratizimin e partisë dhe rikthimin e figurave të larguara apo afrimin e figurave të reja që lista e ardhshme e kandidatëve t’i përgjigjet sa më shumë interesit të anëtarësisë së saj.
Pas një procesi konsultimi e takimesh me degët e çdo qyteti, nga 12 qarqet e vendit ka mbërritur tashmë një listë me preferencat e anëtarësisë në selinë blu. Në fazën e dytë kjo listë do të kalojë vetingun e në Komisionin e Vlerësimit të Kandidatëve dhe më pas do të hidhet sërish në anëtarësinë e partisë, për t’u votuar sipas parimit 1 anëtar, 1 votë. Faza e fundit parashikon zyrtarizimin e listës nga kryesia e partisë dhe miratimin e saj më tej nga Këshilli Kombëtar i PD-së, i cili do të miratojë vullnetin e bazës.
Mes emrave të propozuar është dhe ai i ish-kryeparlamentares, Jozefina Topalli, e cila është propozuar nga anëtarësia e PD-së, Shkodër.
Por, kandidimi i Topallit për deputetet nuk varet vetëm nga pëlqimi i anëtarësisë së PD-së Shkodër. Së pari, propozimi duhet të pranohet nga vetë ajo dhe deri tani nuk ka dhënë asnjë deklaratë për këtë çështje, madje ka refuzuar t’iu përgjigjet pyetjeve të gazetarëve. Dhe së dyti, emri i Jozefina Topallit duhet të zyrtarizohet në listë nga kryesia e partisë dhe miratimi i saj më tej nga Këshilli Kombëtar i PD-së, i cili do të miratojë vullnetin e bazës.
Jozefina Topalli ka shprehur hapur pakënaqësinë e saj, ndaj kreut aktual të PD-së, Lulzim Basha për mënyrën sesi e ka drejtuar partinë më të madhe opozitare në vend.
Pritet të shihet me interes se nëse ajo pranon propozimin e PD-së Shkodër për të kandiduar për deputete, a do të pranohet ky fakt nga kryesia e partisë.
/En.Br./Fjala.al
