Kuvendi i Shqipërisë do të mblidhet ditën e sotme në një seance parlamentare në orën 10.
Në këtë seancë parlamentare do të diskutohet pë një çështje shumë të rëndësishme lidhur me mbajtjen ose jo të postit të Presidentit nga Ilir Meta.
Bëhet fjalë për raportin përfundimtar të Komisionit Hetimor për shkarkimin e Presidentit Ilir Meta.
“Raporti përfundimtar i komisionit hetimor “Për kontrollin e ligjshmërisë së veprimeve të kryera nga ana e Presidentit të Republikës së Shqipërisë, në kuadër të ushtrimit të kompetencave të tij lidhur me zhvillimin e zgjedhjeve për organet e qeverisjes vendore si dhe për të kontrolluar e ligjshmërinë e veprimeve dhe procedurës të ndjekur nga Presidenti i Republikës në kuadër të emërimit të gjyqtarëve kushtetues”. (Ligji nr. 8891, datë 2.5.2002 “Për organizimin dhe funksionimin e komisioneve hetimore të Kuvendit”, neni 25 Rregullore Kuvendi, votim i hapur, shumicë e thjeshtë votash për miratim”, thuhet në njoftimin e Kuvendit.
Kuvendi do të mblidhet edhe ditën e nesërme, si dhe të enjten, ku pritet të përmbyllet Reforma Zgjedhore me dakordësinë mes palëve, si dhe të votohen ndryshimet kushtetuese dhe listat e hapura, propozime këto të opozitës parlamentare dhe të mbështetura nga kryeministri Edi Rama. /Ra.My. Fjala.al/
