Qeveria botërore e futbollit është përfshirë në një tjetër skandal. Presidenti i saj Gianni Infantino akuzohet për “shpërdorim të autoritetit”, “nxjerrje të sekretit profesional” dhe “pengim të hetimit”.
Për këtë arsye ndaj tij ka nisur një procedim penal, i cili mban firmën e Prokurorit të Jashtëzakonshëm Federal në Zvicër, Stefan Keller. Së bashku me kreun e FIFA-s nën hetim është edhe prokurori i parë i kantonit Valais, Rinaldo Arnold.
Akuza për Infantinon vjen menjëherë pas dorëheqjes së Michael Lauber, Prokurori i Përgjithshëm i Zvicrës, në qendër të akuzave për mënyrën se si hetoi skandalin e madh të “FIFA gate”.
Lauber dhe Infantino janë takuar disa herë në mënyrë sekrete gjatë periudhës së hetimeve dhe në këtë mënyrë kanë ngritur dyshime mbi integritetin e tyre.
Në lidhje me këtë çështje kreu i qeverisë botërore të futbollit ka thënë se ai është përpjekur të ndihmojë autoritetet.
“Si president i FIFA-s, qëllimi im që nga dita e parë ishte dhe mbetet të ndihmoj autoritetet për të hetuar veprat penale të kaluara në FIFA”,-ka thënë Infantino.
Ky procedim i ka dhënë zë kundërshtarëve më të mëdhenj të tij, të cilët kërkojnë largimin e Infantinos nga posti më i lartë drejtues i futbollit botëror.ka.ta/Fjala.al/
