Në kryeqytetin e Libanit në Bejrut ka ndodhur një shpërthim katastrofik që ka tronditur të gjithë vendin.
Pamjet e rënda tregojnë momentin e shpërthimit të fuqishëm dhe më pas krijimin e një shtëllunge të madhe tymi që ka mbuluar një pjesë të mirë të qytetit.
Shpërthimi ndodhi pranë magazinave të fishekzjarrëve, edhe pse nuk dihet qartë se çfarë mbanin ato magazine. Ndërkohë ushtria libaneze ka dalë menjëherë në terren.
BBC raporton se shpërthimi ndodhi në zonën e portit të qytetit. Autoritetet thonë se mund të ketë shumë viktima.
Ministri i shëndetësisë në Liban ka thënë se ka shumë të lënduar dhe dëme të mëdha.
Shkaku i shpërthimit nuk është ende i qartë.
Të premten një gjykatë e Kombeve të Bashkuara pritet të nxjerrë aktgjykimin e saj ndaj katër të dyshuarve për vrasjen me makinë bombë të ish-kryeministrit Hariri.
Të katër të dyshuarit janë anëtarë të grupit Hezbollah, që ka mbështetjen e Iranit, i cili vazhdimisht ka mohuar çdo rol në vdekjen e Haririt.
Libani është i përfshirë nga tensionet politike. Gjatë periudhës së fundit janë organizuar demonstrata kundër qeverisë duke kërkuar përmirësimin e situatës më të rëndë ekonomike që nga lufta civile 1975-1990. la.mi/Fjala.al
