Numri i jetëve të shpëtuara gjatë 7-muajve të parë të vitit 2020 është dyfish në krahasim me vitin 2013.
Ministri i Brendshëm, Sandër Lleshaj, duke publikuar statistikat për 7-mujorin e parë të vitit 2020, thekson se gjatë vjeshtës së këtij viti do të prezantohet dhe paketa e plotë e ndryshmeve ligjore, me qëllim përmirësimin e Kodit Rrugor.
“2020 e shpallëm Vitin e Sigurisë Rrugore, me synimin të vijojmë uljen e kurbës së aksidenteve, me objektiv zero jetë të humbura në 2050. Numri i jetëve të shpëtuara në këto 7 muaj është tregues sinjifikativ për punën e bërë nga institucionet dhe rritjen e përgjegjshmërisë tek drejtuesit e mjeteve dhe përdoruesit e rrugës”,- thekson Lleshaj.
“Në vjeshtë 2020 do të kemi gati dhe do të prezantojmë paketën e plotë me ndryshimet ligjore për përmirësimet në Kodin Rrugor, që forcojnë masat dhe i bëjnë rrugët tona më të sigurta”,- nënvizon Ministri Lleshaj.
Sipas statistikave të publikuara nga ministri i Lleshaj rezulton se gjatë 7-muajve të parë të 2020-ës, u regjistruan 635 aksidente në total, 862 aksidente u regjistruan në vitin 2019, teksa në vitin 2013 u regjistruan gati dyfish në krahasim me vitin 2020, konkretisht u shënuan 1129.
Sa i takon jetëve të humbura, gjithashtu kemi përgjysmim të shifrave nga 2013-ta në vitin 2020. Në 7-muajt e parë të vitit 2013 humbën jetën nga aksidentet rrugore 159 persona. Një vit më parë 115 persona, teksa këtë vit 88 persona.
Në fillim të vitit 2020, Ministri i Brendshëm, Sandër Lleshaj, në kuadër të planit për sigurinë rrugore, shpalli këtë vit, si vitin e sigurisë rrugore./Bl.Ba/Fjala.al
