Koha për pushime, por tek tuk dhe ndonjë punë të vogël. Në fakt kjo vlen të thuhet për dy turistë nga Beogradi të cilët kanë zgjedhur vendin tonë Shqipërinë për të pushuar.
Më konkretisht ata së bashku me familjet e tyre po pushojnë në Velipojë dhe teksa gjatë shëtitjes së tyre ishin ndeshur me plehrat që mbulonin pyllin dhe rërën kanë vendosur t’i japin një dorë pastrimi.
Në fakt kjo vlen për tu përgëzuar. Lajmin e ka bërë të ditur Auron Tare në një postim në Facebook teksa e shoqëron edhe me një video të shkurtër nga momentet e mbledhjes së plehrave nga dy turistët.
“Këtë javë kam takuar dy turistë nga Beogradi që bëjnë pushimet në Shqipëri me familjet. I pyes si ndihen. Shumë mirë më thonë asnjë problem ndihemi normal. Pastaj më tregojnë se si në Velipojë kur kishin parë plehrat që mbushnin pyllin dhe rërën kishin filluar ti pastronin vetë. Nuk ke si mos skuqesh kur dëgjon diçka të tillë”, shkruan Auron Tare./Bl.Ba/Fjala.al
