Parid Turdiu, djali i Qazim Turdiut dhe vëllai i Silva Turdiut ka publikuar në rrjetet sociale një foto të motrës së tij teksa bisedonte me diktatorin Enver Hoxha.
“Ketu eshte Silva (majtas Iliri dhe Nexhmija, djathtas duket si punonjese e sherbimit) Të gjithë duken të lumtur, apo jo?” shkruan Parid Turdiu krahas fotos.
Kujtojmë se volejbollistja Silva Turdiu u fejua me djalin e kryeministrit Mehmet Shehut, Skënder Shehun më 1 shtator 1981. Dy ditë pas fejesës shkuan për vizitë Enver Hoxha dhe bashkëshortja e tij Nexhmije Hoxha. Kjo u duk si një bekim i kësaj fejese. Por në fakt shënoi fillimin e kalvarit të jetës së saj dhe familjes Shehu. Kjo fejesë do të shënonte edhe fundin e jetës së vjehrrit të saj e të familjes Shehu, si edhe fillimin e një shtypjeje dhe denigrimi për familjen Turdiu.
Disa ditë më vonë pas fejesës Enveri urdhëron Mehmetin të prishë fejesën e Skënderit me Silvën, sepse Silva kishte “njolla në biografi”, disa lidhje familjare të saj që ishin arratisur në SHBA dhe konsideroheshin si armiq të popullit. Mehmeti e prish fejesën e djalit menjëherë, por sulmi ndaj tij sapo kishte filluar. Ai u thirr në Byronë Politike të Partisë për të dhënë shpjegime mbi këtë fejesë dhe për arsyet që e shtynë ta pranonte këtë lidhje me “armiqtë”. Mehmeti bëri një autokritikë prej 39 faqesh, por kjo nuk e bindi Hoxhën dhe Byronë. Kjo supozohet se e shtyu Mehmetin në vetëvrasje, të cilën e kreu më 17 dhjetor 1981.
/En.Br./Fjala.al
