Dy persona janë vënë në pranga dhe një tjetër është shpallur në kërkim nga policia e Gjirokastrës në kuadër të operacionit “Fluksi”.
Pas hekurave kanë përfunduar shtetasit K.M., 22 vjeç, banues në fshatin Karjan, Gjirokastër dhe Dh.K., 48 vjeç, banues në Kotë, Vlorë.
“Arrestimi i shtetasve të mësipërm u bë pasi gjatë pasdites së djeshme, shtetasi K.M. është kapur në flagrancë duke transportuar me automjetin e tij drejt kufirit Grek, dy çanta brenda të cilave kishte 21 kg lëndë narkotike Cannabis Sattiva si dhe lëndë narkotike e presuar në trajtën e çokollatës, të cilat u sekuestruan në cilësinë e provës materiale. Nga veprimet e kryera hetimore rezultoi se lëndën narkotike do ta transportonte për në shtetin Grek shtetasi Dh. K.” thuhet në njoftimin e policisë.
Burime zyrtare bëjnë me dije se është shpallur në kërkim dhe shtetasi J. K., si organizator i kësaj veprimtarie kriminale.
Gjatë kontrollit të banesës së shtetasit K.M. janë konstatuar të kultivuara disa bimë narkotike.
Shtetasit e mësipërm akuzohen për veprën penale “Trafikim i lëndëve narkotike” e mbetur në tentativë, e kryer në bashkëpunim, gjithashtu për shtetasin K.M. u referuan materialet dhe për veprën penale “Kultivim i bimëve narkotike”.
Materialet në ngarkim të shtetasve të mësipërm i kaluan Prokurorisë pranë Gjykatës së Shkallës së Parë Gjirokastër.
/En.Br./Fjala.al
