Drejtori i përgjithshëm i Organizatës Botërore të Shëndetit për Europën, Hans Kluge ka ngritur shqetësimin e rritjes së infektimeve nga Covid, por sidomos te moshat e reja.
“Vendet europiane po regjistrojnë mesatarisht çdo ditë 26,000 raste të reja infeksioni Covid.
Rastet e reja kanë vazhduar që të rriten çdo javë në rajonin europian. Janë regjistruar 40,000 raste më shumë në javën e parë të gushtit, krahasuar me javën e parë të qershorit, kur rastet ishin në pikën e tyre më të ulët. Çdo ditë tashmë Europa po raporton mesatarisht mbi 26,000 raste të reja.
Kjo vjen edhe si pasojë e lehtësimit të masave shtrënguese ndërsa njerëzit kanë ulur mbrojtjen dhe vigjilencën ndaj Covid. Përhapni argëtim, jo virusin. Mbroni prindërit dhe gjyshërit tuaj”, tha Kluge duke ngritur shqetësimin e infektimit të të rinjve.
Ai paralajmëroi duke thënë se askush nuk është i pathyeshëm.
“Askush nuk është i pathyeshëm. Sipas një studimi të fundit, globalisht, në mesin e njerëzve të moshës 15 deri në 24 vjeç, rastet e Covid-19 janë rritur me një normë prej 4.5% në fund të shkurtit, me 15% në mes të korrikut”, shtoi më tej Hans Kluge.
La.mi/Fjala.al
