Të hapur për dialog, por ende asnjë nga palët nuk pranon të heqë dorë nga pretendimet e veta. Ky ka qenë edhe rezultati i takimeve të ministrit të jashtëm gjerman, me ministrat e jashtëm të Greqisë dhe Turqisë.
Ndërkohë Pritet takimi i së premtes i ministrave të jashtëm të BE, për të zbutur tensionet në Mesdheun lindor.
Situata në Mesdhe nuk po gjen zgjidhje as pas vizitave të Ministrit të Jashtëm gjerman Heiko Maas në Turqi dhe Greqi, ditën e djeshme.
Synimi i Maas ishte ngritja e urave të dialogut mes dy vendeve, për të çuar drejtë fundit sipas tij “Luftën me zjarrin”, por pas deklaratave të dy ministrave kjo gjë duket të jetë ende larg.
Në përfundim të takimit, Ministri i Jashtëm grek Nikos Dendias u shpreh se vendi i tij është pro dialogut me Turqinë, por “Greqia do të mbrojë sovranitetin e vet dhe të drejtat e saj sovrane, pa arrogance dhe kërcënime”.
Pas Athinës, Maas udhëtoi në drejtim të Ankarasë ku ai u takua me Ministrin e Jashtëm turk Mevlut Cavusoglu, i cili në përfundim të takimit i bëri thirrje Greqisë të mos ndërmarrë asnjë hap të gabuar sepse Turqia do të kundërpërgjigjej, duke theksuar edhe njëherë se Turqia nuk kishte ndërmend të tërhiqej në Mesdhe.
Ministri turk gjithashtu akuzoi Greqinë se ajo është shkaktare e përshkallëzimit të tensioneve dhe se ata ishin të gatshëm të dialogonin me çdo vend përveç Republikës Qipriote të cilën ata nuk e njohin.
Në përfundim të konferencës ministri gjerman u shpreh se përshkallëzimi i situatës, nuk i shërben asnjërës palë, as Turqisë, Greqisë apo BE.
Të premten pritet që ministrat e jashtëm të BE-së të japin një zgjidhje për situatën, e cila prej 10 gushtit kur anija kërkimore turke filloi misionin e saj në Mesdheun Lindor, ka parë vetëm përshkallëzim të tensioneve. Ru. Do/ Fjala
