Ish-kryeministri i Kosovës, Ramush Haradinaj, dhe vëllai i tij, deputeti Daut Haradinaj, para rreth tre muajve janë denoncuar në polici për “rrahjen e një punëtori të tyre”.
Puntori i ka denoncuar Haradinajt në Polici një mjeke kujdestare, e cila i ka dhënë ndihmë mjekësore një personi me lëndime trupore të cilat, sipas tij, ishin pasojë e rrahjes nga vëllezërit Haradinaj.
Rastin e ka konfirmuar Policia e Kosovës, e cila ka thënë se e kanë intervistuar ankuesin dhe se në konsultim me prokurorin është iniciuar rast për veprën “Lëndim i lehtë trupor”.
Por pas dy javësh ankuesi ka shkuar në polici dhe ka kërkuar që rasti të mbyllet. Gati 3 muaj që nga kjo ngjarje, vëllezërit Haradinaj ende nuk janë marrë në pyetje në asnjë cilësi.
Sipas dokumenteve dyshohet se e tëra ka nisur më datë 22 qershor 2020, pak minuta para orës 15:00, ku një person ka kërkuar ndihmë në Qendrën e Mjekësore Familjare në afërsi të ndërtesës së Telekomit, në lagjen “Dardania” në Prishtinë, jo shumë larg nga selia e AAK-së.
Pacienti,kur ka kërkuar shërbime shëndetësore sipas shkresës, ka pasur lëndime në trup dhe në sy. Mjekja e cila e ka kontrolluar pacientin e ka njoftuar Policinë menjëherë pas ekzaminimit.
Në raportin e Policisë së Kosovës, të cilin e posedon gazeta Koha, ajo ka përmendur emrat e vëllezërve Haradinaj si shkaktarë të lëndimeve.
