Ngjarja e cila tronditi Pogradecin ku tre të rinj qëlluan me breshëri drejt hotel “Voloreka” kaloi për gjykim në Gjykatën e Tiranës pasi ajo e Pogradecit shpalli moskompetencë territoriale.
Tre të akuzuarit lidhur me këtë sulm u arrestuan në Tiranë në datë 13 gusht, ndërkohë që sot gjykata ka rivlersuar masat e sigurisë për Anterio Kaloshin, Meardi Berberin dhe Ervin Kalaja.
Gjykata e Apelit Tiranë ka vendosur masën “arrest me burg” për këta tre shtetas.
Meardi Berberi, 34 vjeç, banues në Pogradec (person me precedent të theksuar kriminal në fushën e krimeve kundër jetës dhe pronës);Anterio Kaloshi, 29 vjeç, banues në Lushnjë (person me precedent të theksuar kriminal në fushën e krimeve kundër jetës dhe pronës) dhe Ervin Kalaja, 40 vjeç, banues në Tiranë (i dënuar më parë për veprën penale “Armëmbajtja pa leje”) u arrestuan gjatë një operacioni të mirëorganizuar nga Shërbimet e Forcave Operacionale në zonën e Linzës, Tiranë, në garazhin e shtetasit Ervin Kalaja.
Gjatë kontrollit të ushtruar në këtë ambient, këtyre shtetasve iu gjetën e sekuestruan në cilësinë e provës materiale 4 armë zjarri tip pistoletë, 1 armë gjuetie, 1 thikë, krehra, sasi municioni luftarak, të cilat i posedonin pa leje, dokumente të dyshuara si të falsifikuara.
Gjithashtu janë sekuestruar pjesë të ndryshme të armëve të zjarrit që dyshohet se janë përdorur në ngjarje të tjera kriminale, të cilat do dërgohen për ekzaminim ne laboratorin shkencor. /Ra.My.Fjala.al/
