Deputeti i opozitës së re, Adriatik Alimadhi është shfaqur i befasuar nga votimi për përjashtimin e tij me 10 ditë nga Kuvendi.
Në një postim në rrjetet sociale, ai shkruan se ka zbatuar rregulloren dhe nuk ka bërë asnjë gabim tjetër.
Ndërkohë kujtojmë se kryetari i Kuvendit, Gramoz Ruçi e përjashtoi nga punimet e seancës parlamentare deputetin Alimadhi.
Ky i fundit mori fjalën për procedurë, por teksa ai filloi fjalimin kryeparlamentari Ruçi e ndërpreu duke i kërkuar të ulej, pasi nuk po fliste për procedurë dhe tha se ishte në kundërshtim me rregulloren e Kuvendit.
Postimi i plotë i Adriatik Alimadhit
Edhe deputetët e opozitës kanë votuar pro përjashtimit tim për 10 ditë nga kuvendi? Si ka mundësi që ndodh kjo? Edhe pse nuk më lanë të flisja, nuk më dëgjonin, këta kanë votuar pro.
Ç’bëhet kështu, të mendosh se jemi në Parlamentin e Shqipërisë, kur deputetit i privohet e drejta e fjalës? Ai nuk mbanë përgjegjësi për fjalët e tija me kushtetutë, edhe me ligjin për trajtimin e deputetit, deputeti shprehet lirisht.
Kush e ka ndjekur deri në fund debatin, ju siguroj se kam zbatuar dhe kam qenë në përputhje të plotë me rregulloren, kam nisur fjalin time vetëm për Projekt Rezolutën, asgjë tjetër nuk është gabim.
Sa kam përmendur fjalinë partia e punës, ish partia kriminale komuniste, sot partia socialiste, kryetari i kuvendit ndërpret fjalën. Mirë Enver Roshi e ngriti dorën, por Arlind Çaçani që nuk e votoi, si ka mundësi tre vota?
Të mendosh që kjo parti me këtë mendësi dhe veprimtari komuniste ti drejtohet Komisionit Europian me Projekt Rezolut, është fatkeqësi kombëtare që Shqipëria drejtohet akoma nga kjo mendësi, këtë fjali do të thoja, por më privuan të drejtën e fjalës…/Bl.Ba/Fjala.al
