Herë me emër, e herë të tjera duke ia nënkuptuar, Presidenti Ilir Meta, prej kohësh tashmë nuk i kursen shigjetimet ndaj Kryeministrit Edi Rama.
Ai e ftoi ditën e sotme në përballje televizive, ashtu sikundër ftoi socialistët që ta përzënë nga Partia Socialiste.
Por edhe gjatë dekorimit “Nderi i Kombit” të profesor Petrit Radovickës, një nga kolosët e shkencës shqiptare dhe sistemit energjetik të Shqipërisë, kreu i shtetit nuk i kurseu shigjetimet.
“E ardhmja europiane e Shqipërisë do të jetë më e sigurtë nëse reformat që na afrojnë me Bashkimin Europian udhëhiqen nga akademikët, profesorët e intelektualët, dhe jo nga personazhet kalimtare të politikës”, tha Meta në një moment të fjalës së tij.
Po ashtu Presidenti deklaroi se është koha që shoqëria shqiptare dhe institucionet shtetërore në veçanti, të kthejnë vëmendjen ndaj shkencës dhe të dëgjojnë më shumë se kurrë, zërin e personaliteteve të shquara të saj, të profesorëve, akademikëve dhe intelektualëve, që kanë dhënë kontribute të jashtëzakonshme për zhvillimin ekonomik dhe progresin e vendit.
