Presidenti i vendit Ilir Meta i është kundërpërgjigjur kryeministrit Rama pas reagimit të sotëm lidhur me dekoratat e heronjve ku ka përmendur edhe Vojo Kushin.
Nëpërmjet një postimi në Facebook, Meta e quan kryeministrin Rama si Esatin e Rilindjes që i urren Dëshmorët e Kombit dhe Heronjtë.
Presidenti është shprehur se Rama duhet ta ketë të qartë se numërimi mbrapsht për të dhe Sektin pa nder ka filluar dhe nuk do të ndalet.
“Tre milionë ilirë në 25 prill i ka gati” shkruan Presidenti.
“Esati i Rilindjes, pengu i armiqve më të egër të Kombit Shqiptar, që ka nxjerrë në shitje Shqipërinë dhe Kosovën provoi para të gjithë shqiptarëve për të disatën herë se i urren Dëshmorët dhe Heronjtë e Atdheut, si Vojo Kushi, që kanë sakrifikuar gjithçka, duke falur edhe jetën e tyre, për Atdheun”
Kujtojmë se debati mes tyre ka nisur prej një reagimi të kryeministrit nga mbledhja e Asamblesë Kombëtare të Partisë Socialiste ku është shprehur se Meta është i vetmi President që dekoron heronjtë që kanë vdekur para se ai të lindte.
“Edhe diçka të fundit për Ilir Metën, është presidenti i parë dhe i fundit që jep dekorata për ata që kanë vdekur para se ky të lindte, kjo nuk ekziston. Edhe mbretërit nuk japin dekoratat për ata që kanë vdekur më parë. Ka medalje të posaçme për ata që vriten sot, vritet një ushtar në Afganistan i jepet medalja të shoqes, fëmijës. Por që ti të dekorosh heronjtë e popullit kjo tejkalon Boratin, kjo e bën Boratin më të shëmtuar se kopja. Çfarë i bën Ilir Meta, Vojo Kushi?,” është shprehur Rama gjatë mbledhjes së Asamblesë në 9 tetor të këtij viti./Ra.My.Fjala.al/
