Kryeministri i Polonisë, Mateusz Moraëiecki të martën ka njoftuar se është vetëkarantinuar pas një kontakti që ka pasur me një person që ka rezultuar pozitiv në testin për koronavirusin.
Lajmi ka ardhur nga vetë ai, pas një video-mesazhi të postuar në mediat sociale, ku tregon se është karantinuar për arsyen se ka pasur kontakt me një person të infektuar me Covid-19.
Sipas tij, qeveria do vazhdojë të funksionojë normalisht dhe mbledhja e saj e ardhshme do të mbahet përmes një video-konference, një praktikë kjo e zakonshme në muajt e fundit.
Ai po ashtu u bëri thirrje qytetarëve polakë që t’i respektojnë masat për luftimin e koronavirusit, duke i dezinfektuar duart, duke mbajtur distancën sociale dhe duke veshur maska.
Zëdhënësi i Qeverisë polake, Piotr Mueller, tha përmes një deklarate se kryeministri Morawiecki nuk është diagnostikuar me sëmundjen që e shkakton koronavirusi, COVID-19, dhe se nuk ka simptoma të saj.
Karantina e detyrueshme në Poloni zgjat 10 ditë për ata që nuk shfaqin simptoma të sëmundjes COVID-19.
Polonia gjatë javëve të fundit ka regjistruar rritje të mprehtë të numrit të rasteve me koronavirus.
Mbi 3,100 vetë kanë vdekur në Poloni nga COVID-19, prej se ka nisur pandemia globale në muajin mars.
Vetëm dje janë raportuar mbi 5,000 raste të reja, të cilat e çojnë në mbi 135,000 numrin e përgjithshëm të tyre në këtë vend. Ru. Do/ Fjala.al