Në Shtetet e Bashkuara të Amerikës, kandidati që mbledh më shumë para për fushatën zgjedhore presidenciale, pothuajse gjithmonë fiton. Por sa kushton të bëhesh president i Shteteve të Bashkuara të Amerikës?
Nëse do përpiqemi t’i përgjigjemi kësaj pyetje, një artikull i botuar në Quartz, tregon shpenzimet e bëra nga kandidatë të ndryshëm për Shtëpinë e Bardhë në zgjedhjet e fundit, duke i krahasuar këto shifra me numrin e votave të marra.
Rezultatet tregojnë se Donald Trump shpenzoi 5.8 dollarë për votues në vitin 2016-të, ndërsa Barack Obama investoi dy herë më shumë në vitin 2012, rreth 12.8 dollarë (kishte arritur 13 dollarë në 2008). Sa për George W Bush, secila votë i kushtoi 8 dollarë në 2004, nga 5.5 dollarë që ishte në zgjedhjet e mëparshme. Më në fund, Bill Clinton shpenzoi vetëm 4.3 dollarë në vitin 1996 dhe 4.4 dollarë në 1992.
Ndërkaq, dy rivalët presidenciale të vitit 2020, Joe Biden dhe Donald Trump kanë shpenzuar tashmë 350 milionë dollarë secili për fushatën e tyre zgjedhore.
Megjithatë, ajo që ka rëndësi, nuk është vetëm sa investon një kandidat, por edhe sa fonde është në gjendje të mbledhë.
Zgjedhjet presidenciale në SHBA, ndër më të shtrenjtat në botë, do të kushtojnë gjithsej rreth 10.8 miliardë këtë vit, sipas përllogaritjeve të Quartz.
Për të parandaluar faktin që parat të mos bëhen faktor përcaktues në fitore, disa vende si Kanadaja dhe Franca, kanë vendosur një kufi për fondet që mund të shpenzohen në fushatat elektorale.
Sidoqoftë, marrëdhënia mes parave dhe suksesit nuk është gjithmonë aq e drejtpërdrejtë.
Profesori i shkencave politike në Universitetin Rutgers, Richard Lau mendon se mund të ndodhë e kundërta: kandidati që ka më shumë shanse për t’u zgjedhur tërheq më shumë para./Re.D/Fjala.al
